中環出更:引入體感遊戲練肌肉 林煒珊改革傳統護老院

好多長者都唔鍾意入住護老院,原因係護老院環境差、私人空間少同空氣侷促。仁濟醫院早幾年開展咗護理安老院改善計劃,藉以提升院舍嘅環境。計劃係由仁濟醫院前主席林煒珊發起,最近終於完成,佢唔單止採用咗較先進嘅空氣清新機改善空氣質素,設計上都大為改動,引入大量科技元素,等長者喺護老院都可與時並進。

林煒珊話護老院引入咗多個體感遊戲,當中包括打拳、踩單車等,等唔同病患嘅長者針對唔同肌肉訓練去玩,訓練吓啲肌肉、關節同反應,同時護老院開放更多公共空間,等長者家人嚟探佢時都可以一齊打機,製造更多話題。佢仲話自己都成日打機,但主要都係陪佢九歲大嘅囡囡打,而為咗等囡囡唔好沉迷,好多時都係周末先會一齊家庭樂。

林正財試玩單車遊戲

提到單車體感遊戲,身為單車發燒友嘅安老事務委員會主席、行政會議成員林正財隨即眼前一亮,二話不說就去咗試玩,原來遊戲入面採用咗世界各地嘅實境地圖,等玩家可以揀唔同嘅單車路段,一邊玩一邊欣賞世界各地景色。佢喺遊戲中揀咗位於瑞士嘅路段,但原來佢最想踩嘅係法國路段,事關法國每年都舉辦環法單車賽,佢都好想親身去見識吓,但隨住年紀大,佢已經冇幻想自己有機會拎獎喇,仲話只要能夠踩到八、九十歲都已經好幸福。

立法會議員陳恒鑌(Ben)都話呢間護老院同傳統護老院分別好大,完全冇侷促嘅感覺,而佢見到咁多新科技都忍唔住落場試吓,同啲長者一齊執利是,不過就唔係真利是,而係電腦投射影像,眼見婆婆用拐杖執得又快又靈活,搞到阿Ben都忍唔住大讚厲害呀!

卓妮

第一手消息請下載on.cc東網iPhone/iPad/Android/Windows Phone Apps