港鐵沙中線工程醜聞不斷，搞到天怒人怨，尋日立法會辯論用《立法會（權力及特權法）》（特權法）查沙中線嘅動議，以為啲議員會乖乖地留低投票啦，點知一向好關注港鐵、身兼港區全國人大代表嘅議員田北辰就公開同傳媒講話支持特權法，但因為要出席粵港澳大灣區嘅宣講會，估計趕唔切投票喎，仲承認自己「講就天下無敵」。嘩！佢依家講咗就等於投咗，咁日後議員都唔使去開會啦，個個同傳媒「立此存照」就算啦！
