政情：蘇澤光日日數船 確保三跑有沙用
機場第三條跑道建設進度良好，預料基本可以喺明年完成填海。對於三跑工程，機場管理局主席蘇澤光原來幾乎日日都去地盤區域數下運沙船，以證每日都有既定運沙船到達，將每日填海工程所需嘅海沙運到，確保工程唔會因為缺少海沙而延誤，可以話係非常上心。
設嚴密監控 即時核查異常
蘇澤光唔止親身監察，確保三跑填海工程有沙用，為咗唔令填海同三跑工程發生不能預見嘅甩漏，機管局仲用各種監察系統，如攝錄機等，去套取相關工程各個步驟資料，當發現數據有異常情況，就會即時派員到現場查核，以免工程完成之後，先發現有偏差引來爭議。
聽到機管局對三跑工程有咁嚴密嘅監控，比起近日本港其他大型基建如港鐵沙中線等工程屢爆醜聞，相信都好難唔令人慨嘆喇。