政情：自拍唔叻周浩鼎認不如黨友
今時今日影相咁方便，自拍打卡已經係一個潮流，無論係旅行、食飯，甚至開工，都有人會打卡分享，不過立法會議員周浩鼎（Holden）就話自拍唔叻，好多時要集體自拍時，都唔會做揸機嗰個，事關要搵個好嘅角度影晒全部人並唔容易，仲話佢兩個黨友柯創盛同陳恒鑌自拍就最在行，所以每次影集體相，通常都由佢兩個操刀。
憂技術不足 唔敢揸機
Holden仲話，雖然有時做地區工作時都會自拍，但嗰啲相或者片都只係影自己，就算影得差啲都冇問題，睇得清楚就得，但如果要影集體相，就要照顧晒全部人，佢就擔心自己技術不足，所以都唔太敢揸機。
不過，佢早排去美國訪問時，就冇人幫佢影，但為咗可以拍片放上網，報告吓個行程，佢都特登買咗自拍棍同咪帶過去，結果影出嚟效果都唔錯，總算冇白費心機咁話。