政情：林紹輝抄襲海報 白鴿黨紀委會：絕不恰當
民主黨（白鴿黨）葵青區議員林紹輝及黨友劉貴梅，早前被揭發抄襲民建聯（民記）有關長者福利嘅海報，民記立法會議員陳恒鑌（阿Ben）事後去信白鴿黨紀律委員會投訴。阿Ben尋日收到回信，白鴿黨紀委會主席劉慧卿（卿姐）話林紹輝嘅行為絕不恰當，該會希望黨友引以為鑑喎！
卿姐喺信入面話，紀委會收到投訴後，喺上周四開會討論事件，認為林紹輝冇查證圖片來源就用，絕不恰當，指林紹輝已深受教訓並表示歉意，紀委會認為呢啲錯誤唔應該發生。
陳恒鑌指林道歉信為公關手法
不過，阿Ben就話林紹輝唔知錯，喺區內掛橫額繼續攻擊抹黑，感受唔到封道歉信有乜嘢誠意，覺得只係公關手法。佢又話林紹輝水平有限，所以都唔會對佢有任何期望喎。
