中環出更：談中西節慶 徐晉暉：西方情人節賺錢為主
農曆新年同元宵呢兩個重要傳統節日剛過，中間又有二月十四情人節，整個二月都充滿濃厚嘅喜慶氣氛。不過，卓妮早前喺香港中華廠商聯合會（廠商會）嘅新春團拜，唔少人有感傳統節日重要性好似比西方節日低，其中廠商會副主席徐晉暉就嘆西方情人節只係為賺錢喇！
每逢情人節都有唔少商店推出相關產品，但偏偏中國情人節元宵節嘅重視程度就低得多，流於公園睇花燈、猜燈謎。徐晉暉認為西方情人節只係兩個人過，而且消費為主，好似有唔少人買花添，相反元宵節就一家人團團圓圓，食湯圓過，所以兩者雖然都係同情侶過，但意義絕對有所不同喇！睇嚟佢覺得各有可取，不分高低。
史立德指中國人含蓄 係另類浪漫
廠商會核心成員當日傾巢而出，會長吳宏斌、副主席史立德、陳國民同黃家和等都有出席。史立德對情人節都有一番獨特見解，佢認為中國人較為含蓄，將情感收埋心中，所以係另一番浪漫嚟！
至於黃家和就明顯感受到傳統節日氣氛淡薄，尤其今年農曆新年特別多人選擇外遊，令街道變得冷清，佢就覺得與學校無教授傳統節日意義有關。
陳國民覺得年輕人少咗慶祝傳統節日，因為現今娛樂多咗，假期未到已經預早安排節目，而吳宏斌就話的確多咗人選擇新春外遊，但同時都有旅客來港感受新年氣氛，所以今年農曆新年氣氛仲保持得到，但佢就話做生意只得農曆新年假有得抖下，所以其他假期對佢而言無乜關係嘞！
卓妮