政情：今日你上鏡：情人節後生日 植潔鈴呻蝕底

早前喺一個活動上見到東區區議員植潔鈴，問佢情人節點過？佢灰爆咁講「冇人約我呀」，情人節只係返工及同屋企人食飯，就算以往情人節有人約都係一大班朋友。佢生日係二月十六日，點知當日都冇人特別同佢慶祝生日，因為係屋企人團拜，只有兩個女性朋友早一個星期同佢慶祝生日咋，聽落真係好慘！佢話自己生日同情人節好近，真係好蝕底，以往就算有拍拖時，當時嘅男朋友都會慳水慳力，只係揀一日兩樣慶祝晒，大呼「嗰啲男人真係吖」，佢舊年西曆生日仲撞正農曆年初一，個個同佢講恭喜發財，真係覺得二月生日好慘呀！