政情：元宵佳節鍾國斌「食自己」
前日係有「中國情人節」之稱嘅元宵佳節，但立法會紡織及製衣界議員鍾國斌（Felix）就要「食自己」。究竟點解？其實只係Felix整咗塊印有自己個樣嘅餅乾，佢仲同製成品影相兼上載至社交網站，同搞笑地喺貼文中話「真正feel（感覺）到咩叫食自己！」
餅乾印自己個樣 送畀老婆
Felix話佢喺一個推廣活動上見到可以製作印有自己個樣嘅餅乾，於是就整咗兩塊。其實呢個技術亦非新鮮事，只要用手機自拍，上傳到打印機，就可以製作出有自己個樣嘅餅乾。佢仲話一共整咗兩塊餅，一塊畀自己，另一塊就畀太太，仲同太太講「食咗我落肚，咪唔會周圍走囉！」真係估唔到佢同太太結婚咁多年，都仲咁肉麻喎。