政情：劉怡翔玩電話懶理
政府廣告都有講「借錢梗要還，咪畀錢中介」，有借有還方為上等人。工聯會立法會議員何啟明尋日大爆黨友麥美娟（Alice）成日同佢借錢，仲係用嚟搭車同食飯，嚇到會議廳內一眾本來「瞌緊眼瞓」嘅政府高官「醒晒」，統統轉頭望向何啟明。
立會提及內地電子支付
喺尋日嘅立法會特首質詢環節，何啟明趁機問有關港人在內地開戶，提到喺內地冇電子支付就寸步難行，搭唔到車之餘，食飯都落唔到單，而Alice正正就係冇戶口，所以每次返內地都要同佢借錢，幸好Alice每次都還錢。質詢環節雖得半個鐘，但唔少官員都聽到瞌眼瞓，點知聽到Alice要借錢，一班局長齊齊轉身望過去，似乎佢哋都好關心電子支付。
之但係有份推廣電子支付嘅財經事務及庫務局局長劉怡翔就冇望過去，頭耷耷專心喺枱底玩電話，唔通佢諗住眼不見為乾淨，睇唔到就當聽唔到？
事後Alice向傳媒喊冤，話自己只係冇內地銀行戶口，電子錢包冇錢先會借錢增值，但就有還錢，佢仲向金融界議員陳振英求救。陳振英就話自己有兩個內地銀行戶口，分別有數萬港元同人民幣，話試過有女議員返內地冇錢，急急叫佢同助理過數，所以叫Alice下次可以搵佢借錢喎。