中環出更：帶B女返立會 容海恩：餵奶壓力大
立法會議員容海恩（Eunice）上月誕下愛女，成為首位女議員喺任內生BB。而B女出生至今仲差幾日先夠一個月，但尋日已經被帶到去立法會見世面，Eunice仲透露終於為囡囡改好中文名，又話餵奶真係好大壓力。
Eunice現時餵哺母乳，「畀到幾多就幾多」 ，但自言好難、好大壓力同好辛苦，日日對住個奶泵苦惱住量同次數，過程仲好痛。而佢未生B女前已入定媽媽Group學習添！
佢又透露終於為B女改好中文名叫做袁昌蔚，有茁壯成長同茂盛嘅意思，但英文名就仲未有定案，暫時都係叫住囡囡做BB、阿B先。
張宇人派利是 自嘲「廿蚊張」
唔少議員知道Eunice帶埋B女到立法會，都特登去見下佢哋，而B女就依然淡定，全程熟睡。佢所屬政黨嘅主席葉劉淑儀就話好耐無抱BB，但手勢似乎無生疏，更講番佢個女以前好曳唔肯飲奶，三、四個月已經要食粥仔，所以每個BB情況唔同，佢就覺得Eunice個B女好乖同好湊喇！
議員張宇人都嚟湊熱鬧，葉劉見到佢即刻幫B女爭取利是。張宇人就話食薑醋同紅雞蛋後，唔畀利是唔合中國禮儀，佢更自嘲其花名「廿蚊張」，只係廿蚊一封啫，葉劉就話美金又唔怕喎。
兩名女議員麥美娟同葛珮帆就對B女五官最感興趣，大問B女單眼皮定雙眼皮，Eunice就話B女眼細應該單眼皮，點知佢哋望真啲就發現係雙眼皮，而且好深添，異口同聲話Eunice有冇搞錯喇！
卓妮