農曆新年係中國人重要嘅傳統節日，習俗都相對較多，例如派利是、貼揮春咁，孔教學院院長湯恩佳尋日出席香港佛教聯合會新春團拜時就一身唐裝打扮，睇落相當應節。佢話自己一向鍾意着唐裝，屋企有過百套唐裝衫，事關佢比較重視中國傳統，而且覺得着唐裝比較方便、舒服，所以經常都會着唐裝衫出街。至於西裝，湯恩佳就話當然都會有，不過主要係配合特定場合先會着，如果冇乜特別，多數唐裝優先咁話。
