政情：顏汶羽豬年想學舞獅揈獅頭

香港地，做區議員十居其九都「身懷絕技」，唱吓歌仔、扮財神或聖誕老人都係閒事。不過觀塘區議員兼青年民建聯主席嘅顏汶羽（Frankie）竟然多年來都冇表演過，唔通佢有偶像包袱？Frankie笑聞即否認，仲話自己係實力型，實牙實齒話區議員最緊要係為街坊做實事，但今年佢都有打算開發新「技能」喎！

Frankie自言好熱愛中國傳統文化，所以打算今年學舞兩下獅。但舞獅要跳樁柱，身形較為「強壯」嘅佢又真係跳到？佢笑言唔一定要跳嘅，企定定舞吓獅頭都可以嘅，佢仲堅持要企獅頭位，舞獅尾成日要烏低身，如果睇唔到路就論盡嘞！

佢亦打算推廣吓詠春同粵曲，話呢啲傳統文化應該要傳承下去，畀小朋友更多機會接觸。咁係咪學埋一份？佢就耍手擰頭，戲言歌都唔識唱，點去唱粵曲喎！