政情：龐愛蘭加國度歲 體驗餵海龜
踏入豬年，香港嘅天氣暖笠笠，沙田區議員龐愛蘭（Scarlett）就去咗加拿大度歲，過一個天寒地凍嘅農曆新年。Scarlett呢次去加拿大有好多新體驗，包括去溫哥華嘅水族館探索海洋世界，例如睇咗罕有品種嘅魚、青蛙、水母同海馬等，不過唔係齋睇，仲落手落腳餵海龜添！佢喺Facebook上載咗一段短片同幾張相，話有日佢準備咗正餐一千五百克嘅食物，負責餵海龜Schoona，仲摸過Schoona，發現佢嘅殼幾軟吓o架！
透過今次接觸，Scarlett話了解到Schoona嘅背景同生活模式，佢每日只係食一餐，正餐安排喺下午二時，早上就有三百克蔬菜小食。原來Schoona被發現時身體已經好差，好彩獲救後喺工作人員悉心照顧下，得以健康成長。
去朋友餐館學整金魚蝦餃
唔單止睇水族館，Scarlett仲去咗朋友嘅餐館食精緻點心，包括豬頭奶黃包、龜形菠蘿包同天鵝酥等等。食食吓，仲直闖廚房跟師傅學做金魚蝦餃添！認真搞鬼。