政情：「冇膽」張宇人 體重上落大
立法會議員張宇人（Tommy）出晒名為食，佢話體重會喺幾日之間上落幾磅，近日試過原本一百六十九磅，食咗幾日賀年糕點就肥咗幾磅，之後又回落番。最肥就係飲酒，有一次佢特登叫司機返屋企先，等自己考慮到要揸車就唔會飲，點知見到支靚酒，忍唔住打畀司機話「冇咗你唔掂呀」，搵對方返轉頭幫手，結果飲完肥咗五磅喎！
術後未戒肥膩嘢
尋日自由黨舉行新春團拜，適逢初七人日，Tommy帶埋蛋糕嚟到，仲同黨友鍾國斌一齊吹蠟燭添。Tommy話，去年做完割膽手術，醫生叫佢唔好食咁多肥膩嘢，不過佢仲有食o架，只係依家食之前會望清楚廁所喺邊度。原來佢做完手術之後，一食肥膩嘢就要即刻去廁所。聽落都幾忙！