中環出更：沙田求到下籤 何厚祥一笑置之
每逢大年初二，市民都非常關注車公會為香港同埋沙田區嘅流年運程帶來咩啟示，今年沙田區運滯，求得下籤。尋日沙田鄉事委員會（鄉委會）舉行新春團拜，唔少與沙田關係密切嘅人士都有出席，好似鄉委會主席莫錦貴、沙田區議會主席何厚祥、區議員董健莉同李世榮等人。何厚祥話，當日求得下籤後已有親友問佢有冇陰影，不過佢相當豁達，講明會一笑置之。
何話因為人生會有高高低低、有順有逆，沙田都一樣，但最終嘅方向都係會不斷向上、前進。
莫錦貴認為係車公囑咐
莫錦貴亦有另一番解讀，認為下籤係車公對佢哋嘅囑咐，只要做事合情合理、凡事檢討就會做得更好。佢仲話四年前沙田區亦求得下籤，但同樣齊心就可以解決問題，仲點名提到董健莉當年曾因事打電話搵佢求救，佢都係以同一番說話回答。董健莉對於被點名似乎有啲驚訝，坦言估唔到莫錦貴會記住咁耐喎，佢仲話車公雖然會畀啟示人，但自己就唔會去求籤，以免聽完個心囉囉攣。
沙田區議會前主席韋國洪都喺度，佢曾經喺○三年為沙田求籤，當年因為拍住為香港求得下下籤嘅前高官，而引起全港熱議。佢話經此一役，高官不再為香港求籤，改由鄉議局主席代勞，佢都唔敢再求，於是將為沙田求籤嘅重任交番畀鄉委會。
韋國洪話，當年區議會主席為沙田區求籤，鄉委會就為沙田鄉村去求。○三年前求籤時唔會有壓力，但之後就變得好敏感。佢感嘆話，求籤時要講明係「為」而非「代表」香港或沙田，以免求得下籤時畀人怪責憑咩做代表喎！
卓妮