笑看天下:庸官懶政 哪來速度

「香港速度」已一去不返!政府施政一味靠拖,樣樣和稀泥,教人完全看不到積極為民的作風,更遑論魄力!派錢四千元拖足一年依然甩甩漏漏;沙中線醜聞愈爆愈有通車無期;基層上樓時間一延再延;違法佔中包括漢奸黎等三十多名搞手拖足四年仍未告;超強颱風「山竹」去年九月襲港,至今將近五個月仍未妥當「善後」冧樹,今後特衰政府如果再提乜鬼嘢「香港速度」,盞笑死人冇命賠!

冇靈魂政府樣樣都愛拖,呢,好似大埔及將軍澳各有原用作興建康體設施嘅土地,惟政府拖足廿年仍未有動工;屯門亦有一幅康體用地拖足廿年才落實發展計劃,惟落成的設施比早前承諾的「大縮水」,被居民炮轟政府「走數」。設施承諾「大縮水」,反映特衰政府對民生「無小事」係「大縮骨」,政府康體部門成日鼓勵市民多做運動,注意健康,之不過在發展康體設施上,又係講一套做一套。

此外,屯門天后路以南的兩幅空地,同為市政局年代的「產物」,本預計興建草地足球場、籃球場、滑板場以及太極廣場,但多年未動工;及至去年,突然獲城規會改變用途作興建公屋,原本逾二萬平方米土地,僅保留小部分建康樂設施,原定設有的滑板場和太極廣場等又被「走數」。

特衰政府好話說盡,康文署成日話致力推廣「普及體育」,可恨政府吹水就無敵,一味「縮骨」加「走數」,試問有幾着重康體設施?有地都拖足廿年未見動工,無賴兼無口齒成咁,政府民望暴跌豈是無因,樣樣拖到日月無光,庸官加懶政,好心唔好再厚顏無恥吹噓甚麼「迎難而上」!

古人說,「習俗移志,安久移質」,風俗習慣能改變人的思想,一種社會風氣一旦形成氣候,就好難改。冇靈魂政府施政習慣拖泥帶水,「香港速度」已隨風遠逝,吾人只好認命。