政情:隧道變隊道 網民:隊落邊度?

路牌「隧道」變「隊道」,親,大家都有「隊」,不用分得那麼細!外號「金金大師」嘅北區水貨客關注組召集人梁金城喺社交網站上載一張相片,顯示沙田沙角邨單車指路牌中嘅「隧道」,寫成「隊道」,質疑「乜嘢叫隊道呀?即係叫人將架單車隊落邊度先?」佢批評路政署「正一係文盲」,完成後沒相關員工檢查,做法令人丟臉。

嘲諷話係畀車行

金金大師話,曾睇到有市民將相關問題放喺網上分享,原本以為係P圖,於是親自到沙角邨考證,睇到「隊道」一詞後,明言:「點知原來真係咁離譜!」佢仲話有關路牌得到合格認證,批評批出認證嘅人「斷×估」。佢仲hashtag(標籤)咗「#路政署」、「#香港政府 」、「#倒錢落海」同「#文盲」。

好多網民睇完呢個指示牌後都畀咗「哈哈」公仔表態,笑言:「我地(哋)隊咗咁多次都發覺唔到。」有人更諷刺咁話學到新詞語,人行叫隧道,車行叫隊道,「預咗行得都係車隊」?

第一手消息請下載on.cc東網iPhone/iPad/Android/Windows Phone Apps