政情：30年後再行梅窩 洪為民嘆變化大
香港山多平地少，最適合就係行山喇！香港菁英會榮譽主席洪為民（Witman）都係行山發燒友，尋日就同朋友由愉景灣出發，經聖母神樂院行到梅窩，佢話住喺港島區，所以平時多數都會喺港島區行，但今次有朋友推薦呢條路線，就決定趁住假期去遠啲，佢仲話自己大約三十年前行過呢條路線，感覺變化好大咁話。
Witman話梅窩Modern（現代化）咗好多，例如好多路都已經修葺過，靚咗、容易行咗，酒店都經過咗大翻新，更重要係多咗好多餐廳，舊時得啲士多，食吓公仔麵，今時今日已經唔單止有中餐館，仲有西餐廳可以鋸扒！可惜正值新春期間，啲餐廳仲未啟市，冇機會試喇！
唔會帶食物 免招惹牛牛
講起梅窩，早兩日就有野牛闖入超市覓食，唔知Witman有冇遇到牛呢？佢就話行山時都有同朋友講起呢單新聞，不過就冇遇到，佢話呢一帶其實唔常遇到牛，反而喺粉錦公路一帶就較多機會遇見，不過佢話見到都唔驚，事關佢唔會帶住食物招惹佢哋，只係細個嘅時候，乜都唔識先貪得意餵過，懂事後已經冇再咁做喇！