政情：大師測運 梁耀忠衰氣纏身 鄧家彪選情不穩

阿忠係葵青區議員，其立法會「超級區議會」功能界別議席亦係憑區議員呢張入場券。不過，楊師傅指阿忠八字用火木，喺「大水」豬年遇水剋火，官殺受剋，意味全年都冇乜作為，加上咁啱喺農曆十月運勢最差，做咩都撞板，愈做愈錯，不如「Hea」吓好過，而且仲要顧好身體同小心交通意外，總之一句講晒，十月係衰運纏身啦！

至於阿彪，連輸兩場立法會新界東選舉，包括二○一六年換屆同舊年補選，運勢認真麻麻，豬年又點呢？楊師傅話，假如區選喺農曆七至八月舉行，阿彪仲有望憑好運氣當選，但係入冬後運勢急跌，預料佢由離島轉戰沙田區嘅勝算將受影響。此外，阿彪喺農曆三月同四月分別需要小心破財同交通意外。

峯鴿倘再闖禍 同伴或離棄

另一位有機會喺農曆十月食白果嘅，就係舊年四月鬧出涉強搶保安局女行政主任手機醜聞嘅民主黨雙料議員許智峯（峯鴿），楊師傅話假如今年峯鴿再次闖禍，不但因為今年運氣差而要付出更大代價，仲會被同伴離棄添！

同樣農曆十月當黑嘅仲有議會陣線立法會議員朱凱廸，雖然佢未有表明會參加區選，但根據楊師傅所算，朱嘅性格鍾意越級挑戰，有運氣的話仲有些少機會成功，但運氣差就肯定唔使諗，好似區選嗰個月，佢就冇運行，就算幾努力參選都只會徒勞無功。

方國珊大旺 防瑣事惹官非

咁邊個農曆十月大旺呢？楊師傅話係盤據將軍澳多年嘅西貢區議員「哪吒」方國珊，佢豬年運程唔錯，死都救番生，但亦提醒哪吒瑣碎事多，尤其係農曆十一月或惹官非，處理得唔好隨時抵銷全年好運咁話。