中環出更：麥美娟索抱失敗 笑何啟明囝囝高竇

工聯會（工記）尋日大搞花車巡遊，先去港島區打響頭炮，啟明囝囝一到場就成為焦點，連議員麥美娟（Alice）都第一時間上前索抱，點知小朋友未熱身零反應，Alice就大嘆同另一名工記議員郭偉強囝囝差得遠，因為後者好易呃，而且仲會好熱情稱呼佢做「靚女博士」添，有比較下難怪會笑啟明囝囝高竇。

啟明囝囝似乎係怕人多，事關一上到開篷巴士離開人群，就立刻由怕醜仔變到表情多多，啟明更話囝囝第一次坐開篷巴士，玩到唔願落車添！喺活動上見佢哋兩父子大玩騎膊馬，啟明只用單手就扶穩囝囝，證明平日玩得多所以咁熟手喇！

何啟明父子（左下及上）同場，郭偉強（右）都忍唔住搣啟明囝囝面珠墩。（徐家浩攝）

陳凱欣唔怕被詐型只顧去活動。（溫國佳攝）

郭偉強囝囝唔怕陌生

至於郭偉強今次就收埋囝囝，佢解釋因前晚玩得太夜，而巡遊一早舉行就由佢瞓多陣喎，真係夠體貼。佢仲話囝囝由一歲幾開始，已經一齊參加活動，而囝囝唔怕陌生，只要有食物就肯跟人走，唔通多去活動就係練膽方法？

另外，卓妮喺另一活動上見到首次以議員身份過年嘅議員陳凱欣，佢就話新年期間採取放任政策，任由分別九歲同六歲嘅囝囝睇電視，等佢哋開開心心過新年，而佢哋亦因此而夜瞓，所以尋日一早佢出門口出席活動時都未起身，唔怕被詐型放假都唔陪佢哋囉！

卓妮