我有正能量：抗癌耆迹
如果你年屆九旬，突然失去行動及說話能力，連吞食都有問題，會選擇自暴自棄還是積極面對？九十歲的玉卿六年前確診患上舌癌，須切除舌頭及淋巴，她不但未有放棄，從大腿抽取肌肉組織製成人造舌頭，術後更一口氣重新學習走路、說話及吞嚥。六年後的今天，她克服重重困難，逐步回歸正常生活，希望以自身經歷向其他病友說：「我可以，你都可以。」
「覺得好突然，完全估唔到自己患上舌癌。」玉卿憶述，當時只是檢查牙齒，惟醫生竟告知她患上末期舌癌，要切除全部舌頭及淋巴才能痊愈。
九旬嫗患舌癌 大腿肉造脷
「嗰陣無諗太多，只係覺得要生存就要信醫生，醫生先識點醫我，最終決定切咗條脷，再用大腿嘅肉造一條人造脷。」接受手術後，大腿留下一條縫了四十針的傷口，對當時已九十歲的玉卿而言，要重新走路甚至完全康復並不容易，但是她卻未曾想過放棄，「年紀大新陳代謝慢，傷口要時間好番，之後再慢慢學行路，一步一步嚟。但係我唔怕辛苦，唔會埋怨o架，因為個身體係自己嘅，我淨係諗住要好番。」
重新學走路吞嚥 永不言棄
除了學行，她還要面對切除淋巴和舌頭所帶來的問題，頸和口部肌肉均要重新訓練，「一開始頸完全無力，頭都抬唔起，雖然有人造脷，但口郁唔到始終食唔到嘢，有一段時間要插鼻胃喉。」縱然困難一次比一次難跨越，惟她一直堅持，後來更和家人參與由香港公益金贊助，香港基督教服務處舉辦的「食得好」長者吞嚥改善計劃，由專業言語治療師到院舍陪同老人家進行復康訓練。
「教我用飲管吹碗入面嘅水，吹郁個乒乓波同埋按摩面上唔同嘅肌肉，過程係好慢，好多人或者會做做吓覺得無效就唔做，但我覺得最緊要正面同埋唔好放棄，最終都會成功。」正如玉卿所說，在家人及言語治療師的幫助下，玉卿現時已不再依靠胃喉餵食，可以用口進食一些流質及半流質食物如麥皮、糊仔及粥，「除咗食得番嘢，啲肌肉有番力仲講得到嘢，對我嚟講已經好開心啦。」
文：陳名仲
圖：甘偉倫