中環出更：老師讚邱禮濤夠晒多產 讀書數載拍廿部戲
嶺南大學早前舉行首屆「傑出校友服務獎」頒授典禮，得獎者之一嘅著名導演邱禮濤笑笑口話，自己四十幾歲先至重返校園修讀嶺大文化研究碩士同博士，原本希望四年讀完博士，結果五年幾先至畢業。不過當日現身嘅好多老師都大讚邱成績好好，仲話佢讀書期間拍咗二十部電影，如果唔係讀書，可能拍四十部啦！
邱禮濤就話，初期讀番書都覺得吃力，因為要睇好多哲學家同學者嘅文章，一係就一行有幾個生字唔識，有啲就個個字都識，但都唔知講乜，都有心理關口咁話。轉頭卓妮見到嶺大文化研究系教授陳清僑，原來佢係邱嘅論文老師。
歐陽伯權無答是否接任港鐵主席
嶺大校長鄭國漢、校董會主席歐陽伯權（Rex）同埋中華廠商聯合會會董蔡少森都有出席。Rex當晚右眼紅住咁現身，原來佢做咗個小手術，依家已經冇事嘞。外界有傳佢會接任港鐵主席，佢就笑指「我都冇答案畀你」。公職就冇答案嘞，但講起管理機構，Rex都有一套睇法。佢話依家一旦有事發生，喺機構回應前，社交網站已消息滿天飛，好多人對事件已有對與錯嘅定位，令管理階層處理危機時更加困難。不過始終都要面對現實，而多溝通對管理係好重要咁話。
鄭國漢講起點解會舉辦傑出校友服務獎時話，去年慶祝嶺南大學五十周年校慶時，諗起想表揚一班傑出校友，但唔會年年都舉辦，至於幾多年一次就將來再決定。
卓妮