政情：山竹吹毀海邊舖 李秀恒甩身呼好彩
好多人都話香港冇乜天災係福地，但舊年嘅超強颱風山竹就搞到部分市民「揦手唔成勢」。香港中華廠商聯合會永遠名譽會長李秀恒（Eddy）聽見山竹就直呼「好彩」。事關佢差啲入手一個海邊舖位，山竹一吹先知海邊風景宜人卻係有隱患，提早「甩身」冇蝕錢，今次真係經一事，長一智嘞！
Eddy日前出席一個活動時，講起山竹就好興奮同大家分享投資趣事。佢話舊年原本想投資搞吓海邊餐廳，揀咗好耐睇中咗一個海邊舖位，就喺簽合約前一星期山竹吹到，事後去睇吓間舖情況，發現門口泊街邊架單車直飛入舖內，啲閘又吹爛晒，發展商就話會喺兩個月內復原，但佢擔心之後再打風咁點算？最終決定抽身唔投資喇！
提醒置業要留意天災影響
佢慨嘆話，外國人置業會留意吓天災影響，冇諗過香港都一樣要，仲教大家記得將來買樓、買舖都好，謹記要留意會唔會受到打風影響。