政情：葛珮帆 何俊賢 陳克勤 抽動議冇次中黑仔王等轉運

之不過，但唔係個個都咁好彩可以及時提動議兼攞彩，截至尋日為止，民建聯葛珮帆（EQ）、漁農界議員何俊賢（高佬賢）同建制派副班長陳克勤申請提動議失利嘅次數，依次係十二次、十一次同八次，認真黑仔。其中EQ同高佬賢異口同聲話，希望豬年可以轉運抽中動議！

鄭泳舜上任未夠一年已爬頭

立法會最新文件顯示，截至尋日下晝兩點為止，六十九名議員獲編配辯論時段動議不擬具立法效力議案嘅紀錄，目前有四人係抽動議多次都抽唔中，包括EQ、高佬賢、克勤同法律界議員郭榮鏗，當中EQ同高佬賢抽唔中動議嘅次數分別係十二次同十一次，值得留意嘅係，EQ等人畀舊年三月勝出九龍西補選嘅黨友鄭泳舜爬頭，因為鄭上任唔夠一年已成功提出動議辯論嘞！

EQ接受查詢時笑言，希望豬年可以「轉一轉運」抽中動議，事關之前一段時間，佢曾經想提出推動智慧城市議案，撞正有其他議員提咗又抽唔中，惟有改為提出修訂表達意見，佢表明若然豬年抽中動議，會要求政府加強支援離婚家庭，包括跟進單身婦女搵工免受歧視等議題。

陳諗定議題 抽中可即時提出

高俊賢則自爆同黨友夾過，今屆任期首年係讓佢哋抽動議先，自己「讓咗一年」先開始抽，形容至今都抽唔中「有啲黑仔」，希望踏入豬年會「好啲」，如果抽中動議會提出漁農業可持續發展相關嘅內容，希望可以獲得議會同事支持。

至於抽咗八次動議都唔中嘅克勤慨嘆「好慘」，因為上屆四年任期，喺頭一年或第二年就有提動議嘅機會，但時移勢易，依家今屆任期過咗一半都未抽中過，所以佢已經諗定一至兩個議題，包括捐贈剩餘食物等議題，等抽中時就可以即刻提出跟進喎。