中環出更：成首位海關女副關長 何珮珊創造歷史

鄧以海：性別唔會係不利因素

至於何珮珊會唔會成為海關首位女一姐？鄧以海就話政府晉升官員，一直以經驗、領導才能同潛質為先，亦會考慮優先從內部晉升，性別唔會係不利因素，又認為由海關人員晉升關長，對海關係一種鼓勵。

首次以副關長身份出席記者會嘅何珮珊就好謙虛咁話，感謝部門嘅信任及同事嘅支持，現時唯一要做好嘅係海關工作，協助關長帶領及管理部門，共同面對未來挑戰。

何珮珊九一年加入海關，一六年擢升為助理關長，入境處處長曾國衞係佢嘅丈夫。曾國衞早前接受傳媒訪問時，指二人係喺借調到保安局工作時相識，喺○七年結婚。

卓妮