中環出更：容海恩陳家珮都誕B 葉劉讚黨「生產力」強
唔少政黨都有擺年宵攤檔，新民黨主席葉劉淑儀尋日就落咗去撐場，開口就話好似人丁單薄咗啲喎，例如該黨嘅立法會議員容海恩生咗B女，依家就坐緊月，好彩該黨嘅南區區議員陳家珮就坐完月歸隊，葉劉仲大讚新民黨嘅「生產力」好強添！
葉劉早前去探過容海恩同B女，佢話B女依家仲未改名，但因為B女個名要有個「昌」字，B女爸爸又叫袁彌昌，咁不如B女就叫做袁昌妮，英文名就叫Cherry喇！之但係袁彌昌同容海恩兩公婆對改名都好講究，所以仲要研究吓喎。
坐完月嘅陳家珮就話，不時都有同容海恩溝通，亦同佢講過要同坐月員點相處，尤其係喺溝通上同分工上都要傾好，咁就冇咁多問題出現，連陳家珮自己生第二胎，都覺得同陪月員相處係有挑戰o架！
馮載祥父子兵撐母校場
至於立法會前秘書長馮載祥同勞工及福利局局長政治助理馮興禮（Henry）兩父子，就去咗撐母校皇仁書院嘅攤檔。Henry話雖然之前同爸爸喺公開場合撞到，但答應出席同一活動就係首次，兩父子咁多年連一齊行年宵都係第一次咋！
Henry話細個時，爸爸公務非常繁忙，每年都係由媽咪帶佢去行年宵，仲話自己唔會亂買嘢，連媽咪買嘢畀佢都耍手擰頭，原來佢話媽咪嘅品味同佢唔太相同，成日買衫畀佢都唔啱心水，所以不如慳番啲錢。
Henry又大爆爸爸依家潮過佢，原來馮載祥近年學緊日文，話日文比較難學，要記好多嘢，可以幫助防止認知障礙症，所以依家成日喺屋企同老婆、阿仔講日文，可惜Henry話都冇人知佢講乜！馮載祥又話為咗學日文經常都煲日劇同電影，睇住啲日文字幕對番啲音，唔經唔覺就睇咗好多，相比之下Henry就工作繁忙，冇咁多時間睇戲，結果佢爸爸咪仲潮過佢囉！
卓妮