政情：公民講場：臭氧濃度廿年新高 黃錦星搞到亂晒龍

香港空氣污染問題一向為人詬病，根據環境保護署尋日公布本港去年空氣質素情況，臭氧濃度創自一九九九年以來新高，路邊監測站錄得嘅濃度更比二○一三年大幅增加超過七成。其實唔止空氣質素差，問題年年冇改善，近年政府嘅環保政策如去年推出嘅「四電一腦」回收計劃，以及政府正倡議實施、極具爭議嘅垃圾徵費等都搞到亂晒大龍，各界都擔心措施反令香港垃圾圍城。不過環保措施冇樣掂嘅環境局局長黃錦星就自我感覺良好，淨係掛住同人鬥慳電費，自吹自擂屋企電費單零蚊，實情係佢局長表現零分至啱！