政情：陳恒鑌「彎弓射大鵰」醫腰骨

要身體健康就要多做運動，有啲運動仲可以透過伸展肌肉紓緩痛症。立法會議員陳恒鑌（Ben）早前出席一個中華武術活動時，就大耍「彎弓射大鵰」同「搖頭擺尾」等八段錦招式。佢仲話，因為佢椎間盤凸出，壓到神經線，搞到腰痛，之前幾乎行唔到，而佢練呢啲八段錦招式就可以醫腰痛喇。

Ben話，細個時打籃球跌親，腰骨有舊患，依家可能年紀大咗，天氣一變就腰痛，之前立法會審議對立法會議員鄭松泰嘅譴責議案，投票嗰日佢就痛到行唔到，下身麻痹，於是就即刻去咗中環睇醫生，發現有椎間盤凸出，壓住神經線。佢之後試過拔罐、針灸、推拿等，脊醫、西醫同中醫都睇過，都係繼續痛。

佢又話，後來有人叫佢試吓練八段錦，練習多啲用腹肌嘅力。佢練完之後發現身體好熱，腰骨又真係冇咁痛，依家喺立法會一得閒就會練，不過佢就依然未踢得波，要暫時離開立法會足球隊喇。