政情：楊岳橋甩轆後陳宇明即退黨
公民黨（公文袋）黨魁、立法會議員楊岳橋本周三喺立法會大會上甩轆，因為不在席而令到其有關檢討單程證政策嘅議案無法提出，辯論泡湯。曾喺二○一六年打住「關鍵一席」旗號進身立法會嘅楊，頓變「關鍵缺席」。而喺今次甩轆事件發生翌日，曾經為該黨執委嘅陳宇明就提出退黨申請，並於尋日獲確認。陳回覆查詢時就話，已經考慮咗一段時間先作決定，聲稱退黨同楊無關。
暫未有計劃參選區會
陳曾經喺二○一六年參加選舉委員會選舉，當選資訊科技界選委。佢話，經過反思之後，希望喺資訊科技界同埋社運界發展，再加上工作繁忙，覺得需要休息，所以決定退出公文袋。
陳過去亦曾代表公文袋參加二○一五年區議會選舉，出選觀塘栢雅選區，有指其原本亦計劃今年再戰區議會選舉，並考慮落戶深水埗又一村選區，依家喺區議會選舉前決定退黨，選情會唔會有變數呢？佢就話暫時未有計劃參選喎。