政情：魔鬼在細節政府信唔過 勞福局開位淪箭靶
近日政府宣布收緊長者綜援申請門檻，申請長者綜援合資格年齡由現時六十歲提升至六十五歲，民主派同建制派都鬧爆。本周四（10日）立法會舉行特首答問大會，特首林鄭月娥會上就話提高長者綜援申領資格係「議員批准」，一眾議員隨即炮轟林鄭「老屈」。尋日立法會財務委員會開會，議員繼續反擊，連建制派都揶揄政府「魔鬼在細節」、「擺議員上枱」，出席會議嘅勞工及福利局副局長徐英偉（Caspar）淪為箭靶，搞到一個開位建議都拖足三個鐘頭先獲通過。
邵家輝鬧無向商界解釋方案
尋日財委會審議勞工處開設首席勞工事務主任常額職位嘅建議，該職位負責取消強積金對沖機制事宜。該職位原本就同長者綜援措施冇乜關係，但多名建制派議員就乘機寸爆政府。其中率先開火嘅批發及零售界議員邵家輝話，依家逾八成商界都唔明白取消強積金對沖嘅新方案，當局根本冇向商界詳細解釋方案，鬧爆當局依家方案都未定，就已經急住開位。
而勞工界議員何啟明亦都揶揄政府，佢發言時就話「魔鬼在細節」，擔心如果有啲政策唔清楚，又冇人親身做游說工作，一旦落實就會出問題。而紡織及製衣界議員鍾國斌就索性提出中止待續議案，叫政府返去諗清楚先，不過議案就喺七票贊成、三十五票反對、四票棄權下否決。
謝偉銓質問 係咪擺議員上枱
不過咪以為咁就完結，建築、測量、都市規劃及園境界議員謝偉銓（Tony）跟住接力，佢唔單止寸爆政府「信心爆棚」，喺取消強積金對沖方案未通過情況下就申請常額職位，反問政府係咪打算「擺議員上枱」，一旦通過開位建議，就等同支持取消強積金對沖方案。Tony仲提出臨時動議，要求將呢個常額職位變成編外職位，並喺十八票贊成、十五票反對下獲通過。
建制派都阻撓政府實屬罕見，不過Caspar都冇撤回開位建議，將有關職位改為編外職位，喺受靶三個鐘後，開位建議最終都以三十五票贊成、五票反對、兩票棄權下獲通過。而財委會尋日亦已通過涉款十億四千六百四十萬港元嘅屯門西社區健康中心暨安老院舍工程撥款申請。