中環出更：建制冧友又得逞 黃定光自動當選主席
立法會建制派為咗取得主導權，不時都喺各委員會爭奪主席寶座，尋日立法會《二○一八年稅務及強積金計劃法例（關於年金保費及強積金自願性供款的稅務扣除）（修訂）條例草案》委員會首次開會，建制派就再次奪得主導權，由進出口界議員黃定光（象哥）自動當選主席。雖然睇落風平浪靜，但其實競爭早喺開會前夕已經結束。
話說喺委員會開會前兩日，委員會只有十一位成員，建制派同民主派比例係六比五，理論上喺選主席時建制派佔優勢，不過由於有指建制派嘅紡織及製衣界議員鍾國斌反對有關強積金計劃，同建制派立場唔同，有機會令兩邊陣營比例變成五比五，如一旦平手就要抽籤決定，令泛民有機可乘。
人多勢眾 力壓民主派
結果到前日三名建制派議員李慧琼、梁志祥同鄭泳舜就突然加入委員會，冧友意味甚濃，亦令象哥得以穩坐主席之位。據了解，民主派本來都有人想爭做委員會主席，不過可能最終睇見建制派人多勢眾，就無謂浪費時間，由得象哥自動當選喇。
卓妮