中環出更：整完鑽石高爾夫球桿 沈運龍打造金鑽廁所
中華廠商聯合會常務會董沈運龍唔止鍾情以鑽石創作，近年仲多次憑鑽石作品打入健力士世界紀錄，而佢最新一件作品就係鑲咗超過三千粒鑽石嘅高爾夫球桿，價值高達二百五十萬元，尋日該高球桿仲獲健力士世界紀錄認證官確認為「最有價值高爾夫球桿」，唔少朋友都去見證。不過咁都未夠，沈自爆已打造「金鑽廁所」，望再次挑戰紀錄。
香港出產過「金廁所」，沈就話希望再爆啲，要用四萬粒天然鑽石打造咗一個金鑽廁所，以挑戰新嘅健力士世界紀錄。沈曾製作過「鑽石結他」、「鑲嵌最多鑽石的手袋」等作品，原來激發起佢創作嘅係「唔忿氣」三個字。
伍穎梅大讚男友眼光好
沈運龍又話，約廿年前曾製作過一座比成人更高、鑲咗五萬粒珍珠嘅七層塔，一心以為可打破世界紀錄，點知不獲承認，自此營造珠寶生意嘅佢就開始用鑽石衝擊紀錄。而佢最近仲喺香港開設鑽石珠寶藝術博物館，計劃將多件鑽石藏品開放畀公眾參觀，望該館可成為景點。
同場嘅有「九巴金公主」之稱嘅伍穎梅（Winnie）同其男友許晉平。許話對首飾研究唔算深，多數係買畀女朋友。Winnie就放閃大讚男友揀首飾眼光好，而佢就比較鍾意玉石，又話近年玉石產量比鑽石同珍珠仲少。至於廠商會副會長盧金榮就話，買親首飾都唔啱老婆心水，所以依家都係老婆自己揀，再交畀佢埋單，咁就皆大歡喜喇。
廠商會常董陳淑玲就「自己首飾自己買」。佢話鍾意喺去旅行期間買珠寶，因為戴上身靚之餘，仲可以諗番旅行時開心回憶，係雙重開心。
卓妮