政情：立會主席任上市公司董事擬設限 議規會諮詢全體議員
尋日都講過，立法會議事規則委員會（議規會）正研究係咪要限制大會主席出任私人公司董事，而委員會尋日召開閉門會議，會上同意就有關限制諮詢全體議員，再作下一步決定。
提出上述建議嘅副主席梁繼昌話係參考其他國家議會做法，發現其議長或主席都冇兼任當地上市公司職位。佢強調主席係重要憲制職位，需要讓公眾見到行事公正，而通過修訂後，主席仍然繼續擔任上市公司顧問同其家族生意工作，希望能夠得到跨黨派共識。
修訂下周五交內務委員會
委員會主席謝偉俊亦補充話英國、澳洲及加拿大嘅下議院都冇上述規定，只有英國上議院議長限制較嚴格，經充分參考其他國家後會先作諮詢才作決定。佢又透露，會議通過要求主席候選人喺提名時簽署法定聲明以確認國籍，而立法會主席選舉時將改由立法會秘書長負責，修訂將喺下周五交內務委員會處理，預料下月的立法會大會將作審議。