政情：採訪安排一鑊泡 政府明插朱曼鈴

新聞處多甩漏 錯名又錯相

特首林鄭月娥尋日喺行會前慣例同傳媒見面及回應提問，但佢竟喺開場白發言主動提及，話留意到最近兩項傳媒安排採訪，即早前土地供應專責小組（土供組）公布報告安排及即將開通的中環灣仔繞道的採訪安排，引起外界「都有啲意見」。佢更承認以上兩件事情嘅安排有改善空間，要求各政策局喺安排與傳媒交代重要事項，參觀重大基建設施時應「更加主動及更加積極」，因為傳媒深入採訪對政府工作有幫助，佢亦表示尊重傳媒為公眾監督政府的功能。

咁又難怪嘅，回帶睇番之前新聞處的確做事太多「甩甩漏漏」，好似去年中上載特首喺行政會議前會見傳媒嘅講話全文，其中一次竟然將國家領導人嘅名寫錯。至年底時，特首辦又搞錯相片，拖累新聞處出錯相。喺短短半年時間一而再出事，已證明程序未夠謹慎。

政策出台 扑咪取代記者會

至去年除夕當天，土地供應專責小組公布報告，記者要席地而坐記錄內容，已屆六旬嘅小組主席黃遠輝更企足一個鐘做回應。之但係負責土地政策嘅發展局局長黃偉綸，喺上屆政府做過新聞處處長，唔通升咗職就忘記咗要點樣安排？

好似中環灣仔繞道咁，被揭發隧道大滲漏，然而首先係安排議員去睇，跟住搞步行籌款，市民亦睇到隧道有滲水嘅情況，但最後先安排傳媒採訪，呢種做法被質疑唔尊重傳媒監督社會嘅角色。

此外，沙中線紅磡站擴建工程剪鋼筋醜聞，當局正逐步展開鑿石屎檢查工作，卻每每到深夜時分先公布結果。尋日一個記者會上，有記者質疑當局刻意咁做似唔想畀大家知咁，運輸及房屋局局長陳帆只係輕輕一句「唔好意思」帶過。

倘若政府做事真係無愧於市民，又當真尊重傳媒為公眾監督政府的功能，點會唔能夠做得好好睇睇，妥妥當當呢？與其開口責成下屬，倒不如反思如何領導團隊好過嘞！