中環出更：留學訓練獨立 黃家和自己剪頭髮
海外留學能夠開拓視野，加上離鄉別井事事都靠自己，更能訓練出自理能力。卓妮尋日見到唔少名人，好似品牌發展局主席黃家和都有留學經驗，佢就喺呢段日子鍛煉出為自己剪頭髮嘅技能，直至依家嘅髮型都係親自操刀添！
黃家和當年為賺生活費就幫人剪頭髮，每次只賺取一美金，比專業髮型師平一截，自己就嫌貴寧願親自操刀剪頭髮。佢話只要夠膽唔怕剪得肉酸，剪多幾次熟習頭形就會得心應手，所以現時合埋眼剪都無難度，連後腦嘅頭髮都剪得到。
香港浸會大學校董會主席陳鎮仁當年去加拿大讀書，話同宿友一齊讀書、飲酒，呢種回憶無可取代，所以都希望香港大學生能夠有宿舍生活去體驗。佢更透露，當年風氣保守，但學生吸食大麻情況普遍，笑指加拿大去年先將大麻合法化算遲囉，而自己雖然無吸食過，但至今仲記得嗰陣味。
話說尋日為一健康產品品牌嘅廿五周年紀念酒會，唔少名人賞面出席，好似傳承學院榮譽主席陳裕光，而該品牌嘅董事長、香港女童軍總會副會長陳（日義）齡就忙於滿場飛，其兒子謝天澤都非常幫手。
謝天澤留美讀書只顧煲劇
謝天澤嘅父母都係醫生，但佢同哥哥都未有行醫，佢話見爸爸經常凌晨工作，而且覺得病人離世時會難過，就發現自己唔適合讀醫。佢又自爆媽媽以前禁止睇電視而安裝計時器，電視只會喺播放兒童節目時開啟，所以一去美國讀書時就非常自由自在，不過有別其他人只顧出街玩，而係屈喺宿舍瞓覺同煲劇，睇嚟要追番細個無得睇電視嘅時光喎。
卓妮