綠色先鋒：垃時重生
一班銀齡師傅和九十後的社會新鮮人，兩個族群似乎風馬牛不相及，但因抱着同一個環保信念，而各自又身懷絕技——精通手工及木工，故前年決定「埋班」，創辦「流動架生房」，除了到處執垃圾，將它們升級再造，更開班傳授手藝，教人如何重新賦予廢棄物品新的生命。
港人浪費 丟棄物品多全新
「基本上所有材料都係我哋執返嚟，水喉銅管同埋木板最多，啱晒用嚟做飾物。」「流動架生房」創辦人之一、人稱昌哥的劉偉昌從事木工和電工多年，有豐富的「實戰」經驗，因工作的緣故看盡香港人如何浪費，「我哋去垃圾站同資源回收站，通常會滿載而歸，好多畀人丟嘅都係全新物件，就算舊嘅大部分都仲可以正常運作。」他慨嘆部分港人環保意識薄弱，連簡單的珍惜亦未能做到。
義教工藝 改造銅管變飾物
不過，所謂「潮流興復古」，昌哥有感拾來的「垃圾」只要稍加心思便可重獲新生，於是決定開班授徒，於屯門「青年夢工場」作工藝義教，教授如何將廢棄銅管變成戒指和吊飾，結果反應熱烈，吸引不少「九十後」、「○○後」爭相報名，甚至班班爆滿，「學員上完堂之後會諗，係咪真係需要下下買名牌呢，以戒指為例，可能一直以來淨係追求個牌子，並非真係鍾意隻戒指，依家索性學整一隻仲有紀念價值。」
昌哥笑言，「落手落腳」不但沒有嚇跑一眾年輕人，令他驚喜的反而是課程深受女生歡迎，「超過一半學員係女仔嚟，雖然多數都係第一次接觸，但切銅管、打磨等不同工序都可以一手包辦，好犀利。」以採訪當日為例，約八成學員皆是女生，不論是鋸、磨、焊、烙刻及銼修等，大部分工藝技巧她們都游刃有餘。
將廢棄物改頭換面，好玩之處在於可以將成品做到合心水為止，故課堂中昌哥只會講解基本原理和各樣工具的用法，至於成品如何，就要考考學員的手藝及創意，「做任何嘢都好，都係安全最緊要，所以要清楚認識工具嘅正確用法同埋潛在危險，咁就自然唔會驚用錘同電鑽，總好過我幫你做埋你學唔到嘢。」
文：陳名仲
圖：關萬亨