政情：李應生教煲健康老火湯
冬天又凍又乾，唔少人都想煲啲湯水滋補下，不過就有說法指飲得多老火湯易有「三高」、即高血脂、高血壓、高血糖。
煲鱷魚肉唔用雞免燥熱
香港中藥業協會首席會長李應生日前出席一個有關中醫中藥嘅活動時話，要煲湯煲得健康啲就毋須落太多鹽，如要用豬肉煲就可以揀用瘦肉，煲雞湯就可用老雞同埋去雞皮，咁樣煲就冇咁肥喇。
李又話，冬天應該煲一啲潤肺嘅湯，例如用鱷魚肉、百合、蜜棗等，佢仲提醒煲鱷魚肉湯通常唔用雞，因為雞就比較燥熱，落瘦肉同豬（月展）就得咁話。當日佢個仔李俊文（Thomson）都有出席。講起煲湯，Thomson就話美加都有好多人買中藥，因為當地華人比較多。而近年湯包生意都唔錯，因為唔少來港旅客都會買湯包送禮，認為可能同年輕一代未必識自己執藥材煲湯有關喎。