政情：歐遊遇劫葉劉晒腿騷傷勢

仲除大褸展示手（月爭）瘀傷

葉劉一向唔吝嗇騷其玉腿，去年一月佢接受電台節目訪問時被讚悉心打扮，佢當時就擺隻腳上枱騷其藍色鞋，而平時亦都經常喺社交網站上載穿着短褲嘅露腿相。尋日佢被問到其遇劫傷勢時，亦都好大方咁摺起褲腳，畀大家睇膝頭上嘅傷勢，仲除低件大褸展示手（月爭）瘀傷添。

葉劉話，今次旅程去咗幾個國家，喺倫敦、摩洛哥等人多嘅城市都有提高警覺提防扒手，但喺荷蘭遇劫時適逢除夕，唔少店舖提早關門，街道上人流疏落，就稍為鬆懈咗，而事發後都有唔少當地人上前問候。葉劉年紀有番咁上下，跌一跌唔嘢小，不過佢就話冇求醫，只係捽咗藥油，依家已經無咁瘀。好彩佢已冇做保安局局長，否則身為局長被搶劫可能仲「瘀」。