中環出更：內地盜版成風汪恩光教路自保
內地經常出現侵權風波，對版權、專利或商標持有人似乎冇乜保障。多年來從事廚具生意嘅工業家汪恩光就話，近年內地喺保障版權方面有改善，打版權官司九成九都贏。不過，佢都係提醒設計師如果喺內地要保障自己嘅權益，就一定要親身去公證處做完善記錄咁話。
早前香港工業總會轄下香港設計委員會舉辦用以肯定設計對香港工業重要性嘅D-Awards頒獎禮，汪恩光係得獎者之一。汪就話，十幾廿年前如果產品喺內地被人盜版，即使打官司都好難贏，但近幾年情況有所改變，以佢自己生意為例，打咗一百三十多場官司，九成九都贏，全部獲賠償，佢仲開咗個人民幣戶口專收賠償金。佢又話，喺內地搵人整翻版貨品嘅其實主要都係外國人，試過有外國公司拎咗佢嘅產品樣辦，然後攞幾千件貨，再去內地整翻版貨，之後就將正版同翻版貨一齊出售。佢教路，設計師喺內地要保障自己嘅權益，一定要親身去公證處完善記錄低整個設計過程，因為萬一要打官司，有關部門只信公證處。
有「中國變形金剛之父」之稱嘅林亮以製造塑膠小黃鴨聞名，咁小黃鴨有冇試過被侵權呢？林話未有，仲話唔知係咪小黃鴨威力大，宣傳好，冇人敢抄喎。
邱騰華：獨特設計幫貨品增值
委員會主席嚴志明喺活動當晚就戴咗個搪瓷煲呔出席，真係夠晒配合有關設計嘅活動。嚴話，呢個煲呔唔算太重，但會打爛，之前已經唔小心打爛咗同款銀色煲呔，所以今次只能戴個金色嘅出嚟。同場嘅仲有商務及經濟發展局局長邱騰華，邱當晚一到場就簽名留念，仲隨手畫咗幅畫，佢致詞時就話，獨特嘅設計會令產品化腐朽為神奇，設計唔止幫貨品增值，亦令香港成為創意之都。
卓妮