政情：公民講場：減福利恐惹民憤 波叔咪亂開刀

財政司司長陳茂波（波叔）正就新一份財政預算案聽取各界意見，但早前就已經大打開口牌，話盈餘會大幅下降，睇嚟係要降低市民對派糖嘅期望。尋日就有一份民意調查嘅結果顯示，三成四嘅受訪者唔睇好今年嘅經濟情況，仲話會衰過舊年，甚至有兩成半受訪者話唔夠錢使添！好明顯市民口袋冇錢，呢個調查結果係要警告波叔，咪再向基層開刀減福利，否則唔好怪市民發窮惡，激起民憤嘅話，波叔同成個政府都唔會好過。