政情：肥尹推薦做立會主席 謝偉俊：死亡之吻
早排立法會議事規則委員會就議員因行為極不檢點，而遭立法會主席驅趕離場後嘅新罰則進行研究同埋諮詢，同時立法會主席梁君彥嘅處事手法都備受批評，有人甚至建議應該由議規會主席謝偉俊（Paul）做立法會主席一職添。不過咁大頂高帽笠落嚟，阿Paul似乎都嚇親，仲形容「呢個係死亡之吻」喎。
尋日阿Paul出席一個電視論壇，同場仲有民主黨立法會議員尹兆堅（肥尹）。上年立法會修改咗《議事規則》，阿Paul就話喺拉布同拖延議會進度方面已經有改善，但係肢體衝突方面就冇，認為修改《議事規則》可以將立法會帶番去國際水準，同埋得體啲。
肥尹鬧梁君彥時常錯判
肥尹唔止認同阿Paul嘅說法，仲形容議會係「畸形」，因為議會結構同埋主席都唔夠得體、能力低。早排梁君彥喺特首答問環節上，驅逐幾位民主派議員出會議廳，之後仲腰斬埋答問環節，肥尹就話，有建制派議員都認為做法係不必要。
肥尹仲話，今屆議會成日出現小規模鬧交，係因為梁君彥好多時都錯判，導致議員提出規程問題，但對方視而不見，當議員繼續追問時，就會畀梁界定為叫囂，仲作出警告，佢形容呢種做法係夾硬嚟。
鬧完梁君彥之後，肥尹就提到有民主派建議應該由阿Paul做立法會主席，佢聽完都即刻叫好，仲話過去喺阿Paul做委員會主席期間，佢哋都未抗議過，仲成日讚佢做得好添！
謝主張協調式政治處事
聽到民主派嘅讚美，阿Paul好似受寵若驚，多謝對方之餘，仲好謙虛咁話唔敢當，因為呢個係「死亡之吻」。被問到如果由佢做主席，喺立法會會點處事時，佢就話深信健康嘅民主制度係協調式政治，大家都講道理，動口不動手，但現實要執行就有困難。佢仲話，議會應該要有規矩，但依家情況係有規矩冇人守，所以去到某個極端情況就要做嘢，令公眾明白規矩係有人執行。
講番轉頭，其實阿Paul喺上年立法會修改《議事規則》期間，都畀民主派鬧過，只係冇梁君彥嘅情況咁嚴重。依家民主派都支持佢做立法會主席，唔知佢會唔會「口裏說不，身體卻很誠實」呢？