中環出更：用漫畫做牆紙陳志強夢想夠震撼
小朋友生活無憂無慮，充滿童真。卓妮早前喺一個以童真作主題嘅聖誕派對上，同潮州商會青年委員會（潮青）參事陳志強傾開偈，佢話自細儲落唔少美國同本地漫畫，所以早前漫畫界傳奇史丹利（Stan Lee）離世時都好傷感。佢更透露有個夢想係以漫畫當作牆紙去布置屋企添，如果成真，相信效果都幾震撼。
當晚係潮青搞嘅活動，潮青主任委員黃進達、委員李嘉莉同埋顏明秀等人都有出席，其他友好組織嘅年輕代表，就好似香港菁英會副主席林凱章及香港中華總商會青年委員會主席林智彬，亦都有現身同大家打成一片。講開童真，佢哋兩人家族都係經營玩具生意，自細就唔缺玩具，到依家仍然留住啲珍貴收藏，仲不時會添置「新歡」添！
林凱章儲模型 堆到似舖頭
林凱章就話，自己一向有儲開模型嘅習慣，屋企堆積到好似模型舖一樣，見到心頭好時，更會買多過一盒以便收藏咁話。佢仲話，多年來流行嘅玩具都離不開玩具車、公仔同機械人，只係依家會加入科技元素，可以配合平板電腦去玩。
林智彬亦有收藏嘅習慣，因為做開玩具呢行，所以太太都冇阻止佢儲玩具。佢覺得現今玩具追求精緻，需要做到高仿真度，因為唔少買玩具嘅係成年人，佢哋細個得唔到夢寐以求嘅心頭好，長大後有經濟能力先去追求番。不過佢認為小朋友玩具市場都唔能夠忽視，要培養佢哋對玩具嘅興趣，到長大都繼續玩，咁就長做長有喇！
卓妮