政情：鄧竟成辭港航副主席
警務處前處長鄧竟成冇做一哥之後轉戰商界，喺一六年加入香港航空時已獲委任為董事及副主席，尋日就傳出消息指佢已辭去全職職務，改為擔任港航顧問。而港航回覆傳媒時亦確認有關消息，指鄧已喺上月二十日辭任公司副主席一職。
之前已有兩董事離任
鄧較早前回覆傳媒時解釋，辭任係「想多啲時間畀自己」，又形容自己「忙過做警察」，皆因佢仲有好多其他公務工作在身，當中包括郊野公園及海岸公園委員會主席等。
但翻查資料發現，港航近三個月接二連三有董事辭任，包括喺十月離任嘅崔英旭同十一月離任嘅蒙建強，連同鄧竟成即係已經有三名董事離任。而香港航空都喺本月五日已向查冊中心遞交咗「更改公司秘書及董事通知書」，相信係交代鄧辭任一事。