政情：葉劉搞滲漏講座 粉紅橫額惹聯想
立法會議員葉劉淑儀（葉劉）雖然已經六十八歲，但不時悉心打扮、精神奕奕咁返立法會開會，但唔講都唔知佢對滲漏問題都好有心得，仲計劃喺下周六舉行滲漏講座，有網民上載咗佢呢個滲漏講座嘅粉紅色橫額照片，仲惹來網友無限聯想，真係令人想入非非。
網民以為講經期處理
其實葉劉舉行嘅係樓宇滲漏講座，講座下周六喺鰂魚涌社區會堂舉行，佢就聯同其所屬新民黨嘅劉聖雪一齊喺街掛橫額宣傳。呢張粉紅色橫額都認真搶眼。不過有網民就話第一眼睇錯見到「尿滲」，亦有人直言以為係教女性經期如何過得安心嘅講座，有人就認為橫額造型有「婦科醫生feel（感覺）」，亦有人讚用粉紅色「冇得輸」。
正如網民所言，橫額中嘅粉紅色水滴先係「神來之筆」。一張橫額都引來咁大回響，或者都算成功宣傳嘅，希望到時唔會有女士發覺去錯講座啦！