中環出更：劉怡翔講漏口 派錢或推遲
政府喺今年初公布關愛共享計劃，選擇性派錢四千元方案，市民等到頸都長仲未攞到錢。財經事務及庫務局局長劉怡翔喺十月時就話市民最快可以喺明年四月就攞到錢喇，但佢尋日出席立法會一個事務委員會時疑似講漏口，話出年二月申請，「仲要三個月處理申請」，唔通又推遲到明年五月先有錢攞？
劉怡翔喺十月出席立法會接受議員質詢時，話市民最早可以喺明年二月提出申請，預料明年四月有第一批申請人可領取關愛共享金額，但處理全數申請嘅時間需視乎個案複雜性。當時已被議員炮轟計劃複雜，係浪費人力物力。
話要畀錢整新系統
財經事務委員會會議尋日講收緊差餉寬減時，佢話要用錢整個新系統，畀議員鬧爆嘥錢，唔符合衡工量值。佢就話好多時唔同議員有唔同意見，當局又想照顧大家意見，好似關愛共享計劃咁，微調到個系統好複雜，所以市民明年二月一日先有得申請，又要三個月處理，慨嘆都係想搞啲簡單系統啫！
卓妮