中環出更：柯創盛打邊爐一食牛即嘔
好多人都會對食物敏感，立法會議員柯創盛（柯仔）尋日同多名議員一齊去工展會掃街試飲湯，佢飲湯前，即刻問啲湯有冇落牛煲，原來佢一食牛就會嘔！佢話之前同太太打邊爐叫一人一鍋，太太食牛，佢食豚肉，佢嗰鍋可能唔小心沾到少少牛肉湯，搞到佢未返到屋企，已經喺商場嘔。嘩，小心呀！
問起今次帶咗幾多錢買嘢，柯仔就話兩千幾蚊，問起另一名議員鄭泳舜（Vincent）帶咗幾多錢，佢先急急睇吓自己有冇帶錢出街，好彩都有帶一千蚊喺身。Vincent之後可能試飲湯飲得太多，飲飲吓仲咳添！唔通虛不受補？
蔣麗芸入貨入到送購物車
另一名議員蔣麗芸都有去掃貨，仲相當畀面，買咗勁多嘢，佢特別介紹買咗好多整麵包嘅粉，話自己用焗爐整麵包好味啲、健康啲，又少啲添加劑，最緊要係買得多會送購物車，方便買其他嘢。認真精打細算！
中華廠商聯合會（廠商會）都有唔少領導層在場，會長吳宏斌同副會長吳國安兩個都叫Dennis Ng，吳宏斌仲講笑話識咗吳國安冇幾多年，好似尋日先識佢咁，吳國安就講笑話二人成日「狗咬狗骨」。原來佢哋都係做出口嘅，所以都未試過喺工展會擺檔。
佢哋又講起大約喺十年前曾經充滿信心一齊開咖啡店。吳國安解釋，由於當年冇經驗，原來年輕人飲咖啡崇尚品牌，佢哋又好快喺內地同香港開咗六間分店，擴展得太快，結果兩年內就結業，都損失咗七位數字o架，真係好感受到年輕人創業係好辛苦嘅事呀！
卓妮