政情：聖誕派對玩遊戲 象哥騷「事業線」

話說尋日班議員就玩一個名叫「大電視」嘅遊戲，即係睇完題目後靠做動作或描述去引導隊友估答案，而其中一條題目係「事業線」。議員蔣麗芸本來反應最快，但佢舉起隻手去到胸前時，突然將隻手停咗喺半空，唔知係咪怕尷尬。而象哥就喺呢個時候出手解圍，舉起手喺自己胸前比劃，結果佢嘅隊友就即刻估到答案喇。

打乒乓甩轆 畀隊友換走

不過到玩另一個打乒乓波遊戲時，象哥就冇咁精叻喇，事關個遊戲要求參加者每打一球都要根據唔同題目講一個相應嘅詞語，象哥唔知係咪冇聽清楚規則就自告奮勇落場，結果打咗幾次個乒乓波都只係識喺發第一球時講答案，最後佢隊友就要求換人，叫象哥喺側邊學吓先喎。