中環出更：想港青瞓得好楊孟霖 林亮擦出創作火花
講起創新科技，門外漢以為好高深，其實見熟見慣嘅嘢都可以因注入創意而重生。香港創新科技及製造業聯合總會（總會）早前舉行年度頒獎典禮，「中國變形金剛之父」林亮嘅黃鴨仔、香港中小企經貿促進會理事楊孟霖（Ricky）嘅一個專利枕頭都獲頒創新發明大獎。林亮話，黃鴨仔同埋呢個專利枕頭同樣有助激勵年輕人克服困難喎，究竟點解呢？
林亮笑笑口話，佢九十幾歲人為咗黃鴨仔再次創業，不過就唔係為咗賺錢，而係要激勵年輕人克服困難。時下年輕人經常低頭玩手機，瞓得唔好都係一種困難，佢話：「點克服呢？咪搵個好枕頭囉！」佢又話自己嘅養生秘訣係「食得清，行得穩，看得開，睡得狠」，所以狠狠地大覺瞓，真係好重要。
Ricky聽完好似遇到知音咁開心，佢話九成人有枕頭唔啱瞓問題，長期瞓瞓吓就會出現頸椎問題喇，所以佢利用負離子等專利技術研發呢個枕頭，都係想令大家安枕無憂。林亮聽聽吓好感興趣，叫佢做埋小朋友尺寸，可以同黃鴨仔玩Crossover喎。
總會主席李遠發、香港發明創新總會創會會長呂新榮、中國發明協會常務副理事長余華榮及獎項籌備委員會主席呂偉都有到場，事關今次活動由呢三個機構合辦。李話，今次係第六年舉辦，頒發約七十個獎項，目的係鼓勵業界創新發明，否則好易被市場淘汰。
楊志雄赴台搵科技專才
「耳機大王」楊志雄間耳機製造公司都獲頒創新科技成就大獎，佢話香港科技人才始終唔夠，最近佢就特登去台灣搵研發專才，唔排除喺當地設立研發中心咁話。
卓妮