政府去年施政報告提出「免入息審查公共交通費用補貼計劃」，向每月交通開支滿四百元嘅市民提供補貼，計劃下月正式實施。立法會議員就批評政府手腳慢，計劃拖足一年半先成事，搞到市民等到頸都長。不過，運輸及房屋局副局長蘇偉文就解釋，推行計劃要經過法定程序，過程需時，當局仲話計算補貼都涉及複雜技術問題添。既然政府知道複雜，當初就諗清楚兼預備好先推出啦，一早講咗，市民自然會有合理期望，唔鬧爆政府至奇！
