中環出更：初任主席 鄭泳舜被叫錯周浩鼎
立法會跟進本地不適切住屋問題及相關房屋政策事宜小組委員會尋日首次開會，今年三月先當選立法會議員嘅鄭泳舜 （Vincent）有「零的突破」，以三票之差擊敗提出成立該小組委員會嘅議員尹兆堅 （肥尹），首次出任主席一職。而肥尹就喺冇競爭之下自動當選副主席。不過Vincent會議期間就被叫錯名，唔通佢做議員咁耐，仲未被人記得？
今次小組委員會會議原本有三名建制派同一名民主派議員預告會缺席，民主派有機會搶到主席之位。而尋日會上十名建制派準時出席會議，反觀民主派最初只有三名議員準時，另外四人就投票前先趕到，仲有一人更係投完票先現身，似乎唔多落力。
成班議員哄堂大笑
而提名主席人選時就發生小插曲，批發及零售界議員邵家輝舉手提名Vincent，但就衝口而出叫咗「周浩鼎」，發現自己噏錯後拿拿聲糾正，不過成班議員已經哄堂大笑，負責主持會議嘅議員涂謹申都話︰「我以為我睇錯」。
尋日立法會美容業儀器規管和發展事宜聯合小組委員會亦都開會選正、副主席，結果飲食界議員張宇人同議員葛珮帆自動當選為小組委員會正、副主席。
卓妮